مەودا میدیا-

سبەینێ بە ئامادەبوونی سەدان هەزار هاوڵاتیی لە شاری ئامەدی باکووری کوردستان ئاهەنگی گەورەی نەورۆز بەڕێوەدەچێت، وەزارەتی ناوخۆی تورکیاش رێوشوێنی ئەمنی تووندی گرتووەتەبەر و زیاتر لە 10 هەزار پۆلیسی بۆ چاودێری ئاهەنگەکە راسپاردووە.

کەناڵی هاڵک تیڤی رایگەیاند "ئامادەكارییەكان بۆ ئاهەنگی نەورۆزی ئامەد بە دروشمی (کۆمەڵگەی دیموکراسی بۆ ئازادی) بە سەرپەرشتی پارتی یەکسانی و دیموکراسی گەلان (دەم پارتی)، تەواوبوون".

ئاماژەی بۆ ئەوەشکرد "سبەینێ کاتژمێر 10:00ی سەرلەبەیانی ئاهەنگی نەورۆز لە ئامەد دەستپێدەکات، تونجەر باکرهان، هاوسەرۆکی گشتیی دەم پارتی وتارێک پێشكەش دەكات و موزیك و گۆرانی و نمایشی جیاواز ئەنجام دەدرێت، هەروەها چاوەڕوان دەكرێت، پەیامێكی تری رێبەری زیندانیكراوی پەكەكە لە ئاهەنگەكەدا بخوێندرێتەوە".

ئەوەشی خستەڕوو "رێوشوێنی ئەمنی تووند بە ئامادەبوونی زیاتر لە 10 هەزار پۆلیس گیراوەتەبەر و بەربەستێکئ ئاسنین  بە بەرزی سێ مەتر و درێژی 10 کیلۆمەتر لە  دەوروبەری ئەو شوێنە دانراوەكە کە ئاهەنگەکانی تێدا بەڕێوەدەچێت".


ب ح