مەودا میدیا-
هەفتەی رابردوو سعودیە رایگەیاند، مەرجی تەمەن بەسەر حاجیاندا جێبەجێ دەكەن و بەپێی بڕیارەكەش بۆ سەفەری حەجی ئەمساڵ ژمارەیەك لە حاجییانی هەرێم بێبەش دەبن و سەفەرەكەیان دەكەوێتە ساڵی داهاتوو. 
 
دەستەی باڵای حەج و عومرەی عیراق رایگەیاند، بۆ حەجی ئەمساڵ كار بەو بڕیارە دەكەن كە سعودیە بۆ كەمكردنەوەی رێژەی حاجییانی بەتەمەن، بۆ سەرجەم وڵاتانی ئیسلامی دەریكردووە و كاركردن بە بڕیارەكەش ناچارییە.

رۆژی 20ی ئەم مانگە حەج و عومرەی سعودیە رایگەیاند، مەرجی تەمەن بەسەر حاجییاندا جێبەجێدەكات بۆ كەمكردنەوەی رێژەی ئەو كەسانەی كە تەمەنیان لە سەرووی حەفتا ساڵەوەیە، بەو پێیەش لە هەموو عیراق تەنیا 7٪ی ئەو كەسانەی تەمەنیان سەروو 70 ساڵە، دەتوانن بۆ ئەمساڵ سەفەری حەج بكەن.  

بەپێی راگەیەنراوێكی بەڕێوەبەرایەتیی گشتیی حەج و عومرەی هەرێمی كوردستانیش، ئەو كەسانەی بۆ سەفەری حەجی ئەمساڵ ناویان دەرچووە زۆربەیان بە تەمەنن و ژمارەیەكی زۆریشیان تەمەنیان سەرووی حەفتا ساڵە، بۆیە لە كۆی ئەوانەی سەرووی ئەو تەمەنەن تەنیا 358 كەسیان دەتوانن حەج بكەن و ئەوانەشی دەمێننەوە سەفەرەكەیان دەكەوێتە ساڵی داهاتوو. 

راگەیەنراوەكەی حەج و عومرەی هەرێم ئاماژەی بۆ ئەوەشكردووە، بڕیارەكە لەلایەن حەج و عومرەی سعودیە و عیراقەوە بۆ حەجی ئەمساڵ دەرچووە و ناچارن جێبەجێی بكەن.
ئ پ