مەودا میدیا-

تیمی کوردستانی، عیراقی رێکخراوی CPTی ئەمەریکی سەبارەت بە هێرش و بۆردومانەکانی سوپای تورکیا لە مانگی ئاداردا و لە دوای راگەیاندنی ئاگربەستی تاکلایەنەی پارتی کرێکارانی کوردستان راپۆرتێکی بڵاوکردەوە.

کامەران عوسمان، سەرۆکی تیمی کوردستانی، عیراقی رێکخراوی CPTی ئەمەریکی کە وێنەیەکی بۆ مەودا میدیا ناردووە رایگەیاند "سوپای تورکیا لە مانگی ئاداردا، 118 هێرش و بۆردومانی بۆسەر هەرێمی کوردستان ئەنجامداوە".

ئاماژەی بۆ ئەوەشکرد "هەفتەی یەکەمی دوای راگەیاندنی بانگەوازی ئاشتی، عەبدوڵڵا ئۆجەلان، رێبەری دەستگیرکراوی پەکەکە، ژمارەی بۆردومانەکان بەراورد بە دواین هەفتەی پێش راگەیاندنی بانگەوازەکە بە رێژەی 148٪ زیادیکردووە".

ئەوەشی خستەڕوو "هێرشەکانی سوپای تورکیا لە مانگی ئاداردا، بەراورد بە مانگی کانوونی دووەم، بە رێژەی 12٪ و  بەراورد بە مانگی شوبات، بە رێژەی 21٪ کەمیکردووە، وە هەروەها مانگی ئاداردا، سوپای تورکیا 55 هێرشی بۆسەر سنووری پارێزگای هەولێر و 51 هێرشی بۆسەر سنووری پارێزگای دهۆک و 12 هێرشی بۆ سەر سنووری پارێزگای سلێمانی ئەنجامداوەو لە مانگی ئاداردا هیچ هێرشێک لە سنووری پارێزگای موسڵ ئەنجام نەدراوە".

باسی لەوەشکرد "هێرشەکانی سوپای تورکیا بۆسەر سنووری پارێزگای هەولێر لە مانگی ئاداردا، بەراورد بە مانگی شوبات 120٪ زیادیانکردووە و سوپای تورکیا لە مانگی ئاداردا، پێنج ئەشکەوتی سرووشتی بە بەکارهێنانی (تی ئێن تی) تەقاندووەتەوە، هەروەها لە سێ مانگی یەکەمی 2025دا، سوپای تورکیا 404 هێرش و بۆردومانی بۆ سەر هەرێمی کوردستان ئەنجامداوە و بەهۆی ئەو هێرش و بۆردومانانەوە، شەش هاوڵاتیی مەدەنی (دوو شەهید و ٤چوار بریندار) بوونەتە قوربانی".

ب ح