مەودا میدیا-

ئەمڕۆ دووشەممە، لە شاری سلێمانی كەسێكی تر بە ڤایرۆسی كۆرۆنا گیانی لە دەستدا، بەڕێوەبەری تەندروستی قەزای چەمچەماڵی سەر بە پارێزگای سلێمانی روونكردنەوە دەدات.

فەرهاد محەمەد، بەڕێوەبەری نەخۆشخانەی چەمچەماڵ بە مەودا میدیای راگەیاند "ژنێكی بەتەمەنی دانیشتوی چەمچەماڵ ماوەی چەند رۆژێكە لە نەخۆشخانەی شار لە سلێمانی خەوێنراوە و نەخۆشی تری هەبووە".

ئەوەشی خستەڕوو "ئەو ژنە ئەمڕۆ گیانی لە دەستداوە لە نەخۆشخانەو دوای ئەوەی پشكنینی كۆرۆنای بۆ كراوە، دەركەوتووە توشی ڤایرۆسەكە بووە".

بەپێی زانیارییەكانیش، ئەمشەو، بەهەمان شێوەی دوێنێ، زۆرترین حاڵەتی تووشبوون بە ڤایرسی كۆرۆنا لە سلێمانی رادەگەیەندرێت.

لە ماوەی سێ رۆژی رابردوو سێ حاڵەتی گیان لە دەستدان بەهۆی ڤایرۆسی كۆرۆناوە لە سلێمانی تۆماركراوە.