مەودا میدیا-

جێگری بەڕێوەبەری گشتی تەندروستی سلێمانی رایدەگەیەنێت، دۆخی سلێمانی لە رووی تووشبوون بە ڤایرۆسی كۆرۆنا زۆر باشبووە و حاڵەتەكان لە كەمبوونەوەدان، دەشڵێت، دوو هەفتەی تر بەو شێوەیە بەردەوام بێت ئاستی تووشبوون زۆر دادەبەزێت.

هێرش سەلیم، جێگری بەڕێوەبەری گشتی تەندروستی پارێزگای سلێمانی بە مەودا میدیای راگەیاند "لە ئێستادا دۆخی سلێمانی لە رووی تووشبوون بە كۆرۆنا زۆر باشبووە و حاڵەتەكانی تووشبوون كەمبوونەتەوە و تا رادەیەكی باش هێوربوونەوە هەیە لە ڤایرۆسەكە".

ئەوەشی خستەڕوو "ئەگەر بەو شێوەیە پابەندبوونی هاوڵاتیان بەردەوام بێت، دوو هەفتەی داهاتوو بۆ سلێمانی دڵخۆشكەر دەبێت و حاڵەتەكان زۆر كەمدەبنەوە و دەبێت هاوڵاتییانیش پابەندی رێنماییەكان بن و خۆیان بپارێزن چونكە گەیشتونەتە قۆناغێكی زۆر باش".

ماوەی چەند رۆژێكە بەپێی ئامارەكانی وەزارەتی تەندروستی حكومەتی هەرێمی كوردستان، تووشبوون بە كۆرۆنا لەسەر ئاستی هەرێم و بەتایبەت شاری سلێمانی لە كەمبوونەوەدان، پێشتریش سەباح هەورامی، بەڕێوەبەری گشتی تەندروستی سلێمانی رایگەیاند "لە دوو هەفتەدا زیاتر لە هەزار و 700 نەخۆشی كۆرۆنا چاكبوونەتەوە".

ه،ع