مەودا میدیا-

وەزیری تەندروستی حکومەتی هەرێمی کوردستان رایدەگەیەنێت رۆژانه‌ له‌م نه‌خۆشخانه‌یه‌ تووشبووان به‌ كۆرۆنا به‌ ژماره‌ی جیاجیا گیان له‌ده‌ستده‌ده‌ن و ئه‌مڕۆش حاڵه‌ته‌كه‌ هه‌ر به‌و جۆره‌ بووه‌ و مردن به‌ هۆی نه‌مانی ئۆكسجین نه‌بووه، ئاماژەی بەوەشکرد له‌ 24 كاتژمێری رابردوودا، 368 حاڵه‌تی نوێی تووشبوو تۆمار كراون.

سامان بەرزنجی، وەیزری تەندروستی حکومەتی هەرێمی کوردستان لە کۆنگرەیەکی رۆژنامەوانیدا رایگەیاند "له‌ 24 كاتژمێری رابردوودا، 368 حاڵه‌تی نوێی تووشبوو تۆمار كراوون. 3048 پشكنین ئه‌نجامدراوه‌، 78 حاڵه‌تی چاكبوونه‌وه‌ هه‌یه‌. 5 حاڵه‌تی مردن له‌ هه‌ولێر هه‌یه‌ و یه‌كێكیان له‌ فریاكه‌وتن بووه‌ و 4 حاڵه‌تیش له‌ رزگاری بووه‌، 4 حاڵه‌تیش له‌ سلێمانی و 2 حاڵه‌ت له‌ گه‌رمیان تۆمار كراوون و كۆی گشتی 11 حاڵه‌تی مردن بووه‌".

لەبارەی نەمانی ئۆکسجین لە نەخۆشخانەی رزگاری شاری هەولێر وتی "به‌داخه‌وه‌ هه‌ندێك كه‌ناڵی راگه‌یاندن پرسی له‌كاركه‌وتنی كاتیی كارگه‌یه‌كی ناوخۆیی نه‌خۆشخانه‌ی رزگاریان گه‌وره‌ تر له‌ قه‌باره‌ی خۆی پیشانداوه‌ و رۆژانه‌ له‌م نه‌خۆشخانه‌یه‌ تووشبووان به‌ كۆرۆنا به‌ ژماره‌ی جیاجیا گیان له‌ده‌ستده‌ده‌ن و ئه‌مڕۆش حاڵه‌ته‌كه‌ هه‌ر به‌و جۆره‌ بووه‌ و مردن به‌ هۆی نه‌مانی ئۆكسجین نه‌بووه‌".

وەزیری تەندروستی ئەوەشی خستەڕوو "كۆی گشتی تووشبووانی کۆرۆنا لە هەرێمی کوردستان گەیشتە 13614 حاڵه‌ت و 568 حاڵه‌تی مردن هه‌یه‌، کە %3.8ی رێژه‌ی مردن پێكده‌هێنێت".

س.س