مەودا میدیا- سەركۆ جەمال

روانگەی سوریا بۆ مافەكانی مرۆڤ رایگەیاند، حكومەتی توركیا گروپێكی نوێی لە چەكدارانی ئۆپۆزسیۆنی سوریا ناردووەتە لیبیا، ئەویش بۆ پاڵپشتی لە حكومەتەكەی فائز سەراج بەتایبەتیش بۆ شەڕی تەڕابلوس .
روانگەی سوریا ئەوەشی خستووەتەڕوو " ئەو گروپە نوێیەی نێردراون بۆ لیبیا لە 300 چەكدار پێكدێن و لە دوو رۆژی رابردوودا گەیشتوونەتە ئەو وڵاتە ".

ئەو رێكخراوە ئاماژەی بەوەشداوە " تا ئێستا توركیا زیاتر لە 17 هەزار و 300 چەكداری سوری ناردووەتە لیبیا ، لەو ژمارەیەش 350 یان منداڵن و خوار تەمەنی 18 ساڵن ".

توركیا بۆ ناردنی ئەو چەكدارە سوریانە بۆ لیبیا، مانگانە بڕێك پارەیان دەداتێ و بەڵێنیشی پێداون رەگەزنامەی توركییان پێببەخشێت، وەك روانگەی سوریا بۆ مافەكانی مرۆڤ ئاشكرایكردووە.

ئەو روانگەیە راشیگەیاندووە " لە سەرەتای شەڕی لیبیاوە، شەش هەزار چەكداری سوری دوای ئەوەی گرێبەستیان لەگەڵ توركیا لە لیبیا تەواو بووە، گەڕاونەتەوە بۆ سوریا ".