مەودا میدیا-

حکومەتی عیراق لە راگەیەندراوێکدا ئیدانەی ئەو گرژی و ئاڵۆزیانە دەکات کە دوێنێ چوارشەممە لە نێوان هێزەکانی پارتی کرێکارانی کوردستان "پەکەکە" و پێشمەرگەدا روویدا و رایدەگەیەنێت هەموو رێوشوێنێک دەگرێنەبەر بۆ سنووردارکردنی ئەو دەستدرێژیانە.

ئەمڕۆ پێنجشەممە  حکومەتی عیراق لە راگەیەندراوێکدا رایگەیاند "بە تووندی ئەو هێرشە رەتدەکینەوە کە لەناو خاکی عیراق ئەنجامدراوە و بە دەستدرێژیکردنە سەر سەروەریی عیراق هەژماری دەکەین، هەروەها هەموو رێوشوێنێک دەگرینەبەر بۆ سنووردانان بۆ ئەو دەستدرێژیانە، کە بە پێشێلکردنی ئاسایش و سەروەریی وڵات دادەنرێت".

ئەمەش لەکاتێکدایە، دوێنێ چوارشەممە شەڕو پێکدادان لە نێوان هێزەکانی پێشمەرگە و گەریلاکانی پەکەکە لە ناحیەی چەمانکێ لە سنوورى ئامێدى روویدا، بەوهۆیەوە پێشمەرگەیەک شەهیدبوو و دوو پێشمەرگەی دیکەش برینداربوون.

س.س