مەودا میدیا - کاروان نوری

سەرۆكی لیژنە هاوبەشەكانی قایمقامیەتی سلێمانی ئاشکرایکردووە، بەهۆی پابەندنەبوون بە رێنماییەكانی كاركردن لەهەفتەی رابردوودا 81 پسوڵەی سەرپێچی تۆماركراوە و شەش شوێنیشیان داخستووە.
 
لەشكر حەمید، سەرۆكی لیژنە هاوبەشەكانی قایمقامیەتی سلێمانی لە راگەیەنراوێكدا ئاشكرایكردوە "بەهۆی پابەندنەبوون بەمەرجەكانی تەندروستیی و ڤێتێرنەری و رێنماییەكانی دیكەی كاركردن و رێكارەكانی خۆپارێزی، لیژنەكان 81 پسوڵەی سەرپێچییان تۆماركردووە".

 ئەوەشی خستووەتەڕوو "لەسەر سەرپێچی و بەكارنەهێنانی دەمامك و ماددەكانی پاكژكردنەوە بۆ خۆپاراستن لە ڤایرۆسی كۆرۆنا، لیژنەكانی قایمقامیەتی سلێمانی شەش شوێنیان داخستووە و خاوەنەكانیشیان سزای یاسایی دراون".
 
ئەوەشی خستووتەڕوو "بڕی ئەو غرامەیەی لە ماوەی حەوت رۆژی رابردوودا كراوە، چوار ملیۆن و 300 هەزار دینارە و بەپێی یاسا دەخرێتەوە سەر داهاتی گشتی".