مەودا میدیا-

بەڕێوەبەرایەتیی پۆلیسی سلێمانی به‌ تۆمه‌تی‌ دزینی‌ چه‌ندین كه‌لوپه‌لی‌ بیناسازیی‌ و كاره‌بایی دەستگیرکردنی تۆمەتبارێکی راگەیاند، لە کاتی لێکۆڵینەوەدا دانی بە تاوانەکەیدا ناوە.

لە راگەیەندراوەکەدا هاتووە "پاش سكاڵای‌ هاوڵاتییه‌ك كه‌ له‌ یه‌كێك له ‌گه‌ڕه‌كه‌كانی‌ شاری‌ سلێمانی‌ چه‌ندین كه‌لوپه‌لی‌ بیناسازیی ‌و كاره‌بایی لێدزراوه‌، هێزه‌كانی‌ پۆلیس لێكۆڵینه‌وه‌كانیان ده‌ستپێكردو پاش وه‌رگرتنی‌ بڕیاری‌ بە‌ڕێز دادوه‌ر توانرا تۆمه‌تباره‌كه‌ بدۆزرێته‌وه ‌و له‌لایه‌ن مه‌فره‌زه‌كانی‌ نووسینگەی راپەڕینی به‌شی‌ پۆلیسی‌ نه‌هێشتنی‌ تاوانه‌وه‌ ده‌ستگیربكرێت".

ئاماژە بەوەشکراوە "تۆمه‌تباره‌كه‌ له‌به‌رده‌م دادوه‌ری‌ لێكۆڵینه‌وه‌دا دانی به‌وه‌دا ناوه‌ كه‌ ئه‌م كه‌لوپه‌لانه‌ی‌ دزیوه‌، (40 جه‌گی‌ ئیشكردنی‌ وه‌ستای‌ دارو ته‌خته‌، 15 جه‌گی‌ گه‌وره‌ی‌ دارو ته‌خته‌، موەلیده‌یه‌كی‌ 12 ئه‌مپێری ‌‌و چه‌ندین كه‌لوپه‌ی‌ كاره‌بایی دیكه‌)".

باس لەوەشکراوە "تۆمه‌تبار (ع، ك، م له‌دایكبوی‌ 1979) به‌ بڕیاری‌ به‌ڕێز دادوه‌رو به‌پێی‌ ماده‌ی‌ 443 له‌ یاسای‌ سزادنی‌ عیراقی‌ راگیراوه‌ و لێكۆڵینه‌وه‌كان به‌رده‌وامن".

س.س