مه‌ودا میدیا-

به‌پێی ئاماری رێكخراوی لێبوردنی نێوده‌وڵه‌تی كه‌ تایبه‌ته‌ به‌ خۆپیشاندان و ئاڵۆزییه‌كانی عیراق له‌ ماوه‌ی  3 مانگی رابردوودا، 669 كه‌س كوژراون و 25 هه‌زار كه‌سیش برینداربوون.

ئه‌مڕۆ شه‌ممه‌ 25ی كانونی دووه‌می 2020 رێكخراوی لێبوردنی نێوده‌وڵه‌تی رایگه‌یاند " له‌ ئه‌نجامی خۆپیشاندان و ئاڵۆزییه‌كانی عیراق، به‌هۆی به‌كارهێنانی هێز له‌ دژی خۆپیشانده‌رانی عیراق له‌ سه‌ره‌تای خۆپیشاندانه‌كانه‌وه‌ تا ئێستا 669 كه‌س كوژراون و 25 هه‌زار كه‌سیش برینداربوون".

له‌لایه‌كی تره‌وه‌ ئه‌مڕۆ شه‌ممه‌ له‌ پارێزگای زیقار 3 كه‌س كوژران 13ی تر برینداربوون، به‌پێی زانیاری میدیاكانی عیراق كوژراو و برینداره‌كان ئاسه‌وای گوللـه‌یان پێوه‌بووه‌.

هه‌ر ئه‌مڕۆ له‌ به‌غدا هێزه‌ ئه‌منییه‌كان هه‌وڵی بڵاوه‌ پێكردنی خۆپیشانده‌رانیان داو توانییان چه‌ند رێگایه‌كی سه‌ره‌كی بكه‌نه‌وه‌ كه‌ماوه‌یه‌كی زۆره‌ له‌لایه‌ن خۆپیشانده‌رانه‌وه‌ داخراون.

هاوكات هه‌ر ئه‌مڕۆ لیژنه‌ی باڵای خۆپیشاندانه‌كانی عیراق جه‌ختی كرده‌وه‌ له‌ به‌رده‌وامی خۆپیشاندانه‌كانى عيراق.