مەودا میدیا-

سەرۆكی پێشووتری پەرلەمانی توركیا رەخنەی لە بڕیار و هەوڵەكانی ئەردۆغان بۆ داخستنی پارتەكانی ئۆپۆزیسیۆن گرت و رایگەیاند "چارەسەری كێشە سیاسییەكان ناكات".

حیسامەدین گیندۆرك، سەرۆكی پێشووتری پەرلەمانی توركیا راگەیاند "داخستنی پارتەكانی ئۆپۆزیسۆن لە توركیا خزمەت بە چارەسەركردنی كێشە و چالاكییە سیاسییەكان ناكات".

لێدوان و هەڵوێستەكەی سەرۆكی پێشووتری پەرلەمانی توركیا لەكاتێكدایە پارتی داد و گەشەپێدان "ئەكەپە" داوایەكی یاسایی بەگەڕخستووە بۆ داخستنی پارتی دیموكراتی گەلان "هەدەپە" كەوا نوێنەرایەتی چارەسەركردنی دۆزی كورد دەكات.

گیندۆرك پێشتر ئەندانی پارتەكانی "دیموكراتی، دادپەروەری و توركیای گەورە" بوو كە هەموویان داخراون، بەڵام لەكۆتاییدا بووە سەرۆكی پەرلەمانی توركیا و لە نوێترین هەڵوێستیدا دەڵێت "داخستنی حزبەكان كارێكی باش نییە".

سەرۆكی پێشووی پەرلەمانی توركیا جەختی لەوەشكردووەتەوە "داخستنی حزبە سیاسییەكان، سیاسەت بەهێز و ئیرادەی مرۆڤەكان لاواز و بێهیوا دەكات، پێویستە پارێزگاری لە پارتەكانی ئۆپۆزیسیۆنی ناو پەرلەمان بكرێت، چونكە دیموكراسیەت سیستمی لێوەردەییە".

خ.غ