مەودا میدیا-

سەرۆکی هاوپەیمانی نیشتیمانی رایدەگەیەنێت سەپاندنی هەر کاندێدیک بۆ سەرۆک وەزیران لەلایەن ئێرانەوە رەتدەکەنەوە ئاماژەی بەوەشکرد ئەو جوڵانەوە جەماوەرییە کە لە سەرتاپای عیراق دەستیپێکردووە جوڵانەوەیەکی تایبەتە. 

ئەیاد عەلاوی، سەرۆکی هاوپەیمانی نیشتیمانی لە تویتێکدا نووسیویەتی "هەر کاندیدێک بە بڕیار یاخود بەدەستوەردانی ئێران و هەر وڵاتێکی تر بسەپێنرێت بەبێ گەڕانەوە بۆ خۆپیشاندەران لە رووی سیاسی و لەناو خەڵکەوە رەتدەکرێتەوە و دەبێتە هۆی درووستکردنی دۆخێکی ئاڵۆزتر".

عەلاوی سەبارەت بە خۆپیشاندانەکان ئاماژەی بەوەکردووە "ئەو جوڵانەوە جەماوەرییە کە لەسەرتاپای عیراق دەستیپێکردووە، جوڵانەوەیەکی تایبەت و دڵسۆزانەی عیراقیانەیە و هەمو جۆرە دەستوەردان و کاریگەرییەکی دەرەکی رەتدەکەینەوە و ئێمەش پاڵپشتی دەکەین و سور دەبین لەسەری".