مەودا میدیا-

پاش ئەوەی لە گەرمیان دەستبەدابەشکردنی زەوی بەسەر زیندانییانی سیاسی کرا، وەزارەتی شارەوانی و گەشتوگوزاری حکومەتی هەرێمی کوردستان ئاشکرایدەکات، دابەشکردنی زەوی بەهەموو شێوەیەک راگیراوەو ئەوەی کراوە یاسا شکێنییەو هیچ بەهایەکی یاسایی نییە.

وەزارەتی شارەوانی و گەشتوگوزاری حکومەتی هەرێمی کوردستان، لە رێگەی روونکردنەوەیەکەوە دەڵێت "رەفتارکردن و دابەشکردن و مامەڵەکردن لەگەڵ زەوی و زاری حکومەت و موڵکی گشتی، لەناو سنووری شارەوانییەکان، بەبێ رەزامەندیی فەرمی وەزارەتی شارەوانی و گەشتوگوزار، هەر لایەن و فەرمانگە و کەسێک بیکات، ئەوا یاسا شکێنیە و لێکەوتەی یاسایی بەدوادادێت".

دەقی روونکردنەوەکە:

روونکردنەوەیەک لە وەزارەتی شارەوانی و گەشتوگوزارەوە
  
چەند رۆژێکە هەواڵێک لە دامودەزگاکانی راگەیاندن، سەبارەت بە دابەشکردنی زەوی لە چەند ناوچەیەکی کوردستان بڵاو دەکرێتەوە، بۆیە ئەم روونکردنەوانەی خوارەوە بەپێویست دەزانین: 

- توێژەکانی کوردستان ئەوانەی بەپێی یاسا و رێنماییەکان مافی وەرگرتنی زەوییان هەیە لە هەموو پارێزگاکانی کوردستان، حکومەتی هەرێمی کوردستان ئەو مافەیان لەبەرچاو دەگرێت و لە کاتی هەبوونی ژمارەی زەوی پێویست کە بەپێی پلان بۆ نیشتەجێکردن ئامادە دەکرێت، بەسەر سەرجەم توێژەکان دابەش دەکرێت، نەوەک بە جیاوازی و لە چەند شوێنێکی دیاریکراو و بەکارهێنانی زەوی گشتی لە پێناوی مەرامی سیاسی و دابەشکردنی بەسەر دۆست و لایەنگران و دروستکردنی ئەمری واقیعێک بە دوور لە بنەمای یاسایی. 

- رەفتارکردن و دابەشکردنی زەوی دەبێت بەشێوەیەکی دادپەروەرانە بێت، بۆ هەموو خەڵکە موستەحەق و شیاوەکان بێت، بەپێی بڕیار و رێکار و بنچینە یاساییەکان بێت. 

- رەفتارکردن و دابەشکردن و مامەڵەکردن لەگەڵ زەوی و زاری حکومەت و موڵکی گشتی، لەناو سنووری شارەوانییەکان، بەبێ رەزامەندیی فەرمی وەزارەتی شارەوانی و گەشتوگوزار، هەر لایەن و فەرمانگە و کەسێک بیکات، ئەوا یاسا شکێنیە و لێکەوتەی یاسایی بەدوادادێت.
 
- حکومەتی هەرێمی کوردستان، بە هەموو شێوەیەک کاری نایاسایی رەفتارکردن لەگەڵ دابەشکردنی زەوی بە شێوەی هەوایی و کارت راگرتووە و کاری پێ ناکرێت، پێچەوانەی ئەوە هیچ بەهایەکی یاسایی نابێت. 

- موڵکی گشتی و زەوی و زار، موڵکی هەموو خەڵکی کوردستان و نەوەکانی داهاتوومانە و رێگەنادرێت بە نایاسایی بەکار بهێندرێت.

ه.ع