مەودا میدیا-

ئەندامێکی لیژنەی وزە لە ئەنجومەنی نوێنەرانی عیراق رایدەگەیەنێت هەرێمی کوردستان و بەغدا گەیشتوونەتە رێککەوتنی كۆتایی لەسەر كێشە هەڵپەسێردراوەكانی نێوانیان، ئاماژە بەوەشدەکات ئەو رێککەوتە بنەمایەکی باشە بۆ بودجەی ساڵانی داهاتوو.

ئەمجەد عیقابی، ئەندامی لیژنەی وزە لە ئەنجومەنی نوێنەرانی عیراق بە میدیا عیراقییەکانی راگەیاندووە "هەرێمی کوردستان و بەغدا گەیشتوونەتە رێککەوتنی كۆتایی لەسەر كێشە هەڵپەسێردراوەكانی نێوانیان و رێگە بە دیوانی چاودێریی دارایی فیدڕاڵ دەدرێت لە دامودەزگاكانی هەرێمی کوردستان ئامادەیی هەبێت".

ئەو ئەندامەی لیژنەی وزە ئاماژەی بەوەشکردووە "لێكتێگەیشتنەكان تەنها لەبارەی خاڵەكانی بودجەوە نیین، بەڵكو دۆسیەكانی وزە و چاودێری دارایی و پابەندبوونەكانی سەر هەرێم لەخۆ دەگرن، ئەمەش بنەمایەکی باشە بۆ بودجەی ساڵانی داهاتوو".

س.س