مەودا میدیا-

بەڕێوەبەرایەتیی پۆلیسی پارێزگای سلێمانی دەستگیرکردنی شەش تۆمەتباری راگەیاند بە تۆمەتی بەکار‌هێنانی حەب و مادەی هۆشبەر، هەروەها دەستیش بەسەر بڕێک حەب و مادەی هۆشبەردا گیراوە.

لە راگەیەندراوەکەی پۆلیسی سلێمانیدا هاتووە "دوای ئەوەی زانیاری گەیشتە هێزەكانی پۆلیسی پارێزگای سلێمانی كە سێ تۆمەتبار ماددەی هۆشبەریان پێیە و بەكارهێنەری ئەو ماددانەن، بەڕێوەبەری پۆلیسی پارێزگای سلێمانی، بنكەی پۆلیسی سەرچناری ڕاسپارد کە لێکۆڵینەوەو بەدواداچوون بۆ دەستگیرکردنی تۆمەتبارەکان ئه‌نجام بده‌ن و هەریەك لە تۆمەتباران (ك، ح،أ) لەدایكبووی 1983، (ع، ح، د) لەدایكبووی 1994 و (ك، م، م) لەدایكبووی 1983 لەناو شاری سلێمانی لەلایەن بنكەی پۆلیسی سەرچنارەوە دەستگیركران و لەكاتی دەستگیركردنی تۆمەتبارەكاندا دەست بەسەر بڕێك حەب‌ و مادەی هۆشبەردا گیرا".

ئەوەش خراوەتەڕوو "دوای لێكۆڵینەوەكانی پۆلیس، دەركەوت كە تۆمەتبارەكان بە رەگەز ئێرانین ‌و دانیشتووی قەزای دوكانی سەر بە پارێزگای سلێمانین ‌و سێ تۆمەتباری دیكەیان لەگەڵدا بووە، بۆیە بەشی پۆلیسی دوکان و بنکەی پۆلیسی فریاکەوتنی دوکان هەستان بە گەڕان‌ و پشكنینی شوێنی نیشتەجێبوونی تۆمەتباران و توانرا هەریەك لەتۆمەتباران (أ، ح) لەدایكبووی 1987، (ب، ح) لەدایكبووی 1985  و (پ، م) لەدایكبووی 1981 دەستگیر بکرێن و دەستیش بگیرێت بەسەر بڕێك حەبی بێهۆشكەر‌ و مادەی هۆشبەر لە جۆری حەشیش".

س.س