مەودا میدیا-

ھێزەکانی بەرەی بەرگری نیشتمانیی لە ویلایەتی پەنچشیری ئەفغانستان ھێرشێکی چەکدارانی بزوتنەوەی تاڵیبان بۆ سەر ویلایەتەکە شکست پێهێنا و 115 چەکداری تاڵیبانیشیان کوشت.

لە لێدوانێکدا فەھیم دەشتی، وتەبێژی بەرەی بەرگری نیشتمانیی ئەفغانستان لە ویلایەتی پەنچشیر رایگەیاند، "پەلامارێکی تاڵیبانیان شکستپێھێناوە و 115 چەکداری بزووتنەوەکە کوژراون و 200ی دیکەش برینداربوون و 35 چەکداریش دەستبەسەر کراون". 

لەلایەکی دیکەوە بزووتنەوەی تاڵیبانیش جەخت دەکاتەوە لەوەی لە پێشڕەویدان بەرە و ویلایەتەکە و کۆنترۆڵی دەکەنەوە.

ویلایەتی پەنچشیر لە باکوری خۆرھەڵاتی کابوڵ، لەلایەن ھێزێکی بەرگری سەر بە ئەحمد مەسعودەوە بەڕێوەدەبرێت ، تەنھا ویلایەتە لە ئەفغانستان لەلایەن تاڵیبانەوە کۆنترۆڵ نەکراوە، پێشتریش لە ساڵانی دەسەڵاتیدا لە 1996 بۆ 2001 ، بزووتنەوەکە نەیتوانیوە ئەو ویلایەتە کۆنترۆڵ بکات.

ر. ر