مەودا میدیا-

بەڕێوەبەرایەتیی پۆلیسی پارێزگای سلێمانی دەستگیرکردنی تۆمەتبارێکی راگەیاند بە تۆمەتی بریندارکردنی برایەکەی بە فیشەک لە گەڕەکی سەرچناری شاری سلێمانی.

لە راگەیەندراوەکەی پۆلیسدا هاتووە "دوای‌ ئه‌وه‌ی‌ له‌ رووداوێكدا له‌گه‌ڕه‌كی‌ سه‌رچنار كه‌سێك له‌ ماڵه‌كه‌ی‌ خۆیدا به‌ فیشه‌ك له‌لایه‌ن برایه‌كی‌ خۆیه‌وه‌ برینداركرا، ده‌ستبه‌جێ له‌لایه‌ن هێزه‌كانی‌ پۆلیسه‌وه‌ لێكۆڵینه‌وه‌ له‌ڕووداوه‌كه‌ ده‌ستیپێكردو پاش وه‌رگرتنی‌ بڕیاری‌ به‌ڕێز دادوه‌ر توانرا تۆمه‌تباره‌كه‌ له‌لایه‌ن مه‌فره‌زه‌كانی‌ بنكه‌ی‌ پۆلیسی‌ سه‌رچناره‌وه‌ ده‌ستگیربكرێت".

ئاماژە بەوەشکراوە "له‌ئێستادا تۆمه‌تبار (ئـ ، ئـ ، ع) به‌بڕیاری‌ به‌ڕێز دادوه‌رو به‌پێی‌ مادده‌كانی‌ (405) و (31) له‌یاسای‌ سزادانی‌ عیراقی‌ راگیراوه‌و لێكۆڵینه‌وه‌كان به‌رده‌وامه‌، هەروەها تۆمەتباری ناوبراو لەچەند بنکەیەکی دیکەی پۆلیس سکاڵای لەسەر تۆمارکراوەو داواکراو بووە، بەھۆی تەقەکردن و شەڕکردن و ھێرشکردن بە چەک".

س،س