مەودا میدیا-

بڕیارە سبەینێ كۆمسیۆنی باڵای سه‌ربخۆی هه‌ڵبژاردنه‌كان له‌ عیراق له‌ سه‌رجه‌م پارێزگاكاندا پرۆسه‌ی هاوشێوه‌ی ده‌نگدان به‌شێوه‌یه‌كی ئه‌زمونی تاقیبكاته‌وه‌ و پرۆسه‌كه‌ هاوشێوه‌ی رۆژی ده‌نگدانه‌.

لە راگەیەندراوێکدا كۆمسیۆنی باڵای سه‌ربخۆی هه‌ڵبژاردنه‌كان له‌ عیراق ئاماژەی بەوەکردووە "كه‌ وه‌ك ئامادەکاریی بۆ ئەنجامدانی هەڵبژاردنی ئەنجومەنی نوێنەرانی عیراق‌ و تاقیکردنەوە و دڵنیابوونەوە لەئامێرەکانی دەنگدان، سبەینێ چوارشەممە 2021/9/22 کاتژمێر 10:30ی بەیانی ئۆفیسی هەڵبژاردنی سەرجەم پارێزگاکانی عیراق لەرێگای ناوەندەکانی تۆمارکردنەوە پرۆسەی سێهەمی هاوشێوەی دەنگدان (محاكاه‌ عملیه‌ الاقتراع) ئەنجامدەدەن".

ئەوەشی خستووتەڕوو "له‌و پرۆسه‌ ئه‌زمونییه‌دا دەزگاکانی راگه‌یاندن تەنها رووماڵی پرۆسەکە بکەن و زانیارییەکان وەربگرن، به‌ڵام لێدوانی رۆژنامەوانی تێدا نادرێت و تیایدا وەک رۆژی دەنگدان کارمەندانی ناوەندەکانی تۆمارکردن‌ و کارمەندانی رۆژی دەنگدان لەسەر کاغەزی تایبەت بەم جۆرە دەنگدانە دەنگ دەدەن‌ و ئەنجامی دەنگدانەکەش راستەوخۆ دەگوێزرێتەوە بۆ ئۆفیسی نیشتمانی لەبەغداد".

له‌لای خۆیه‌وه‌ ئۆفیسی هەڵبژاردنەکانی سلێمانی بانگهێشتی دەزگاکانی راگەیاندن دەکات کە ئامادەبن لەم ناوەندانەی لای خوارەوە بەمەبەستی رووماڵکردنی پرۆسەکە.

- قوتابخانەی دڵداری بنەڕەتی/ شەقامی شەست مەتری، بەرامبەر هۆتێل تایتانیک.

-  ناوەندی تووی مەلیکی کچان/ تووی مەلیک ـ نزیک چێشتخانەی وەستا حسن.

-  قوتابخانەی سەرکەوتنی بنەڕەتی/ شەهیدانی سەرچنار ـ گردە بڕاوەکە.

ر. ر