مەودا میدیا-

کێشەی گوندی تووە سپی چارەسەر دەکرێت و قایمقامی سلێمانیش رایدەگەیەنێت جێگری سەرۆکی حکومەت ھاتووەتە سەر ھێڵ و لە رێگەی دروستکردنی شارەوانییەک  کێشەی زیادەڕۆیی لەو سنوورە لە ئایندەدا چارەسەر دەکرێت. 

‎به‌ ئامانجی چاره‌سه‌ری كێشه‌ی دانیشتووانی گوندی تووەسپی، ئەمڕۆ چوارشەممە 22.9.2021 ئاوات محەمەد، قایمقامی سلێمانی پێشوازی کرد له‌ نوێنه‌ری دانیشتوانی گوندی تووه‌ سپی و رایگه‌یاند "جێگری سه‌رۆكی حکومەت ھاتووەتە سەر ھێڵ و له‌ هه‌وڵی چاره‌سه‌ركردنی كێشه‌كه‌دان بەشێوەی یاسایی".

‎لە بارەی کێشەی ئەو گوندە کە شەوی رابردوو بەھۆی دروستکردنی چەند خانوویەکی زیارەڕۆیی رووداوێکی نەخوازراو روویدا ئاوات محەمەد بە ‌ ئاماده‌بونی به‌ڕێوه‌به‌ری ناحیه‌ی به‌كره‌جۆ و به‌شی یاسایی قایمقامیه‌تی سلێمانی رایگەیاند "پێشتر ھەوڵی چارەسەرکردنی کێشەی زیادەڕۆیی ئەو گوندەیان داوە  و لە رێگەی دروستکردنی شارەوانییەک و  جیاکردنەوەی سنووری گوندەکە، بەڵام دانیشتووانی گوندەکە چاوەڕێی ئەو ھەوڵانەیان نەکردووە بۆ چارەسەرکردنی کێشەکانیان بەشێوەیەکی یاسایی".

‎قائیمقامی سلێمانی ئاماژەی بەوەشکرد "له‌سه‌ر فه‌رمانی قوباد تاڵه‌بانی، جێگری سه‌رۆكی حکومەت ھەوڵی چارەسەرکردنی کێشەی گوندی تووەسپی دراوە و لیژنەیەک بۆ ئەو مەبەستە پێکھێنراوە و لە ئایندەیەکی نزیکداو لە رێگەی دروستکردنی شارەوانییەک تایبەت بەو سنوورە کێشەی زیادەڕۆیی بەشێوەی یاسایی چارەسەر دەکرێت، داواشی لە دانیشتووانی گوندەکە کرد ھاوکاریاننبن بۆ ئەوەی کێشەکانیان بەیەکجاری و لە رێگەی دامەزراوەکانی حکومەتەوە چارەسەر بکرێت".

شەوی رابردوو لەکاتی رێگریکردن لە دروستکردنی چەند کۆگا و خانوویەکی تازە دروستکراو لەلایەن پۆلیسی دارستان و ژینگەی سلێمانی لە گوندی تووە سپی گرژی و ئالۆزی دروست بوو، لە ئەنجامدا عەمیدێکی پۆلیسی دارستان و شەش کارمەندی دیکە برینداربوون.

س.س