مەودا میدیا-

بەڕێوەبەرایەتیی پۆلیسی پارێزگای سلێمانی لەسەر دۆسیەی تەقەکرد لە هاوڵاتییەک دەستگیرکردنی سێ تۆمەتباری راگەیاند و دەستیشیان کرد بەسەر ئەو چەکەی تەقەی پێکراوە.

لە راگەیەندراوەکەی پۆلیسی سلێمانی هاتووە "دوای‌ ئه‌وه‌ی‌ له‌ ئۆتۆمبێلێكه‌وه‌ كه‌ دوو سه‌رنشینی‌ تێدابووه‌ ته‌قه‌ له‌ هاوڵاتییه‌ك ده‌كرێت و به‌ر ئۆتۆمبێله‌كه‌ی‌ ده‌كه‌وێت و تۆمه‌تباران هه‌ڵدێن، ده‌ستبه‌جێ‌ پۆلیس لێكۆڵینه‌وه‌كانی‌ دەستپێکرد و سه‌رەنجام له‌لایه‌ن مەفرەزەکانی بنكه‌ی‌ پۆلیسی‌ سه‌رچناره‌وه‌ هه‌مان رۆژ تۆمه‌تباران دۆزرانەوە و دەستگیرکران و ده‌ستیشگیرا به‌سه‌ر ئۆتۆمبێله‌كه‌یاندا،  دوای‌ لێكۆڵینه‌وه‌ش تۆمه‌تبارێكی‌ تر ده‌ستگیرکرا كه‌ چه‌كه‌كه‌ی‌ له‌ دوو تۆمه‌تباره‌كه‌ وه‌رگرتبوو ده‌ستیشگیرا به‌سه‌ر چه‌كه‌كه‌دا كه‌ له‌ جۆری‌ كڵاشینكۆفه‌".

ئاماژە بەوەشکراوە "لەئێستادا هه‌رسێ تۆمه‌تبار  بە ناوەکانی (س، ع، ع  -  ئ، ح، ر  –  ر، ع، م )  به‌ بڕیاری‌ به‌ڕێز دادوه‌ر راگیراون و لێكۆڵینه‌وه‌ له‌گه‌ڵیان به‌رده‌وامه‌".

س،ر