مەودا میدیا-

بەڕێوەبەرایەتیی ئاسایشی سلێمانی سەبارەت بە هەواڵی ئازادكردنی تۆمەتبارانی كێشەی یەكێك لە خویندنگەكانی ناوشاری سلێمانی كە لەلایەن هێزەكانی بەڕێوەبەرایەتیی ئاسایشی سلێمانی یەوە دەستگیركران روونکردنەوە دەدات.

لە راگەیەندراوەکەدا هاتووە "سەبارەت بە هەواڵی ئازادكردنی تۆمەتبارانی كێشەی یەكێك لە خویندنگەكانی ناوشاری سلێمانی كە لەلایەن هێزەكانی بەڕێوەبەرایەتیی ئاسایشی سلێمانی یەوە دەستگیركران و پاش راگرتنیان بەپێی مادەی 413 لە یاسای سزادان و دواتر لەسەر فەرمانی بەڕێز دادوەر ئازادكران بە بارمتەی یاسایی".

ئاماژە بەوەشکراوە "بۆ رای گشتیی رادەگەیەنین لەبەرئەوەی تۆمەتباران سەربازن و بەجلوبەرگ و چەكی سەربازییەوە هەستاون بە هەڵكوتانە سەر خوێندنگەیەك و لێدانی خویندكارێك و باوكی خوێندكارەكە، لەئێستادا ئەو تۆمەتبارانە لەسەر فەرمانی ئەنجومەنی  لێكۆلینەوەی وەزارەتی پێشمەرگە/فەرماندەیی هێزەكانی (70) لە بەڕێوەبەرایەتیی ئاسایشی سلێمانی بە راگیراوی ماونەتەوە بە مەبەستی رادەست كردنیان بە یەكەی سەربازی هێزەكانی (70)  و ئەنجامدانی لێكۆڵینەوە و سزادانیان بە پێی یاسای سەربازی بۆ ئەوەی هیچ كەسێك ناوی پیرۆزی پێشمەرگەو دەزگا ئەمنیەكان بۆ مەرامی تایبەتی خۆی بەكار نەهێنێت".

س،ر