مەودا میدیا-

پرۆفیسۆر دكتۆر مارف عومەر گوڵ، نووسەر و مامۆستای زانكۆ، گیانیلەدەستدا، ‏ماوەیەك لەمەوپێش جەڵتەی مێشك لێیدابوو.‏

پێش نیوەڕۆی ئەمڕۆ گیانلەدەستدانی پرۆفیسۆر دكتۆر مارف عومەر گوڵ لە نەخۆشخانەی ‏ئەنوەر شێخە لە سلێمانی راگەیەندرا، دوای ئەوەی ماوەیەك لەمەوبەر جەڵتەی مێشك ‏لێیدابوو و كاریگەریی لەسەر تەندروستیی هەبوو، بڕیارە ئەمڕۆ تەرمەكەی بگەڕێندرێتەوە بۆ سەنگاو و لەوێ بەخاكبسپێردرێت.‏

د. مارف عومەر گول یەکەمین ئەکادیمیستی کوردە، بە گۆشەنیگایەکی ئەکادیمییەوە، ‏توێژینەوەی لەسەر جینۆساید و جینۆسایدی کورد نووسیووە و لەو بوارەشدا خاوەنی ‏چەندین توێژینەوە و کتێبی دانسقەیە. ‏

ماوەیەک راگری کۆلیژی یاسای زانکۆی سلێمانی بووە، هەروەها لێپرسراوی لیژنەی ‏بەرزکردنەوەی بڕوانامەی زانستی بووە لە کۆلیژی یاسا و رامیاریی زانکۆی کەرکوک. ‏

سەرپەرشتیی دەیان نامەی ماستەر و دکتۆرای كردووە لە زانکۆکانی هەرێمی كوردستان.‏

د. مارف خاوەنی چەندین شیعر و شیعری لیریک و گۆرانییە، زۆرێك لە شیعرەكانی ‏لەلایەن هونەرمەندانی گۆرانیبێژەوە كراونەتە گۆرانی.‏

مارف عومەر گوڵ، ساڵی 1956 لە گوندی هەشەزینی ناوچەی سەنگاوی قەزای ‏چەمچەماڵ لەدایکبووە.‏

ر. ئ.