مەودا میدیا-

بەهۆی شەپۆلی بەفر بارینەوە دەوامی قوتابخانەکان لەسنووری قەزای چۆمان، حاجی ئۆمەران، قەسرێ، گەڵاڵە و سمیڵان، لە سلێمانی و قەزای چەمچەماڵ راگیرا.

بەڕێوەبەرایەتی پەروەردەی چۆمان لە ئاگادارینامەکەیدا بڵاویکردەوە "بۆ سەرجەم  بەرێوەبەرانی قوتابخانەکانی سنووری بەرێوەبەرایەتییەکەمان، بەھۆی بارینی  بەفر و سەختی  رێگەکانەوە سبەینێ دووشەمە 17-1-2022 پشووه لەسەرجەم قوتابخانەكانی سنووری پەروەردەكەمان".

لە هەمان کاتدا لە ئاگاداری نامەیەکدا قایمقامییەتی چەمچەماڵ رایگەیاند "لەسەر داواکاری بەڕێوەبەری پەروەردەی چەمچەماڵ و بە فەرمانی قاییمقامی چەمچەماڵ بەهۆی شەپۆلی سەرما و دابەزینی پلەکانی گەرما، سبەینێ دوو شەممە 17-1-2022 لە باخچەکانی ساوایان و پۆلەکانی یەک تا سێی بنەڕەتی پشوو دەبێت".

قایمقامییەتی چەمچەماڵ لە ئاگادارییەکەدا ئاماژەی بەوەشکردووە "پشوو ئەو قۆناغانە ناگرێتەوە کە تاقیکردنەوە ئەنجام دەدەن".

ر. ئ.