مەودا میدیا-

سه‌رچاوه‌یه‌كی ئه‌منی له‌ پارێزگای كه‌ركوك رایگه‌یاند، ئه‌مشه‌و له‌ڕێگه‌ی بۆمبێكی ده‌ستییه‌وه‌ هێرشكراوه‌ته‌ سه‌ر نووسینگه‌ی شاخەوان عه‌بدوڵا، جێگری دووەمی سەرۆکی ئەنجومەنی نوێنەرانی عیراق و هیچ زیانێكی گیانی لێنه‌كه‌وتووه‌ته‌وه‌.

سه‌رچاوه‌یه‌كی ئه‌منی له‌ پارێزگای كه‌ركوك بە مەودا میدیای راگه‌یاند، ئه‌مشه‌و له‌لایه‌ن ژماره‌یه‌ك چه‌كداری نه‌ناسراوه‌وه‌ بۆمبێكی ده‌ستی هه‌ڵدراوه‌ته‌ ناو نووسینگه‌ی شاخه‌وان عه‌بدوڵا و ته‌قیوه‌ته‌وه‌، له‌ ئه‌نجامیشدا زیانی زۆری به‌ر بینای نووسینگه‌كه‌ و ده‌وورووبه‌ره‌كه‌ی گه‌یاندووه‌.

ئه‌و سه‌رچاوه‌یه‌ باسی له‌وه‌شكرد، هێرشه‌كه‌ هیچ زیانێكی گیانی لێنه‌كه‌وتووه‌ته‌وه‌، سه‌رجه‌م پاسه‌وان و كارمه‌ندانی نووسینگه‌كه‌ی جێگری دووه‌می سه‌رۆكی په‌رله‌مانی عیراق سه‌لامه‌تن.

لە هێرشێکی هاوشێوەدا بەرەبەیانی 13ی ئه‌م مانگه‌ لقی پارتی دیموکراتی کوردستان لەبەغدا لەرێگەی بۆمبێکی چێنراو كرایه‌ ئامانج، هێرشەکەش زیانی مادی لێکەوتەوە و زیانی گیانی نەبوو.

ر. ئ.