مەودا میدیا-

یەكگرتووی ئیسلامی داوادەكات یەكێتیی و پارتی لەسەر كاندیدێكی هاوبەش بۆ پۆستی سەرۆك كۆمار رێكبكەون و دەڵێت "بۆ ئەوەی لەوە زیاتر ناو ماڵی كورد لەبەریەك هەڵنەوەشێت".

لە راگەیەندراوێكدا كە ئەمڕۆ یەكشەممە بڵاویكردەوە، ئەنجومەنی جێبەجێكردنی یەكگرتووی ئیسلامیی كوردستان جەختدەكاتەوە لەسەر ئەوەی هەرچی زووترە یەكێتیی نیشتمانیی كوردستان و پارتی دیموكراتی كوردستان، پێداچوونەوە بەو هەڵوێستەیاندا بكەنەوە و لەسەر پاڵێوراوێكی هاوبەش رێككەوتن بكرێت "بۆ ئەوەی لەوە زیاتر ناو ماڵی كوردی لەبەریەك هەڵنەوەشێت و ناچارمان نەكەن بە هەڵوێستی تر".

لە دوای كۆبوونەوەی ئەنجومەنی جێبەجێكردنی یەكگرتووی ئیسلامیی كوردستان بە سەرۆكایەتیی سەڵاحەدین بەهائەدین، ئەمینداری گشتیی یەكگرتوو راگەیەندراوەکە بڵاوکراوەتەوە و تێیدا ئەوەشی هاتووە "لە كۆبوونەوەكەدا گفتوگۆكرا لەسەر پرسی هەڵبژاردنی سەرۆك كۆماری عیراق، كۆبوونەوە نیگەرانیی قووڵی خۆی راگەیاند لەسەر لێكترازانی ناو ماڵی كوردی و ئەو ململانێ نەخوازراوەی دوو حزبی دەسەڵات دەیكەن سەبارەت بە پرسی سەرۆك كۆمار كە پشكی كوردە و دەبێت كۆدەنگیی نیشتمانی لەسەربێت".

لە راگەیەندراوەکەدا باس لەوەشکراوە "ئەنجومەنی جێبەجێكردن جەخت لەسەر ئەوە دەكاتەوە كە هەرچی زووترە دوو حزبی دەسەڵات پێداچوونەوە بەو هەڵوێستەیاندا بكەنەوە و لەسەر پاڵێوراوێكی هاوبەش رێككەوتن بكرێت، بۆ ئەوەی لەوە زیاتر ناو ماڵی كوردی لەبەریەك هەڵنەوەشێت و ناچارمان نەكەن بە هەڵوێستی تر".

بسم الله الرحمن الرحيم

بەلاغی كۆبوونەوەی ئەنجومەنی جێبەجێكردنی یەكگرتووی ئیسلامی كوردستان

بەسەرپەرشتی بەرێز مامۆستا سەلاحەدین محەممەد بەهائەدین ئەمینداری گشتی یەكگرتوو ئەنجومەنی جێبەجێكردنی یەكگرتووی ئیسلامی كوردستان كۆبوونەوەی ئاسایی خۆی لە شاری هەولێر ئەنجامدا، لە كۆبوونەوەكەدا تیشك خرایە سەربارودۆخی سیاسی هەرێم و عێراق و گۆرانكاری و پێشهاتەكان راڤە و تاوتوێكران، هەر لەچوارچێوەدا گفتوگۆكرا لەسەر پرسی هەڵبژاردنی سەرۆك كۆماری عێراق، كۆبوونەوە نیگەرانی قووڵی خۆی راگەیاند لەسەر لێكترازانی ناو ماڵی كوردی و ئەو ململانێ نەخوازراوەی دوو حزبی دەسەڵات دەیكەن سەبارەت بە پرسی سەرۆك كۆمار كە پشكی كوردە و دەبێت كۆ دەنگی نیشتیمانی لەسەر بێت.

ئەنجومەنی جێبەجێكردن جەخت لەسەر ئەوەدەكاتەوە كەهەرچی زووترە دوو حزبی دەسەڵات پێداچوونەوە بەو هەڵوێستەیاندا بكەنەوە و لەسەر پاڵێوراوێكی هاوبەش رێكەوتن بكرێ، بۆ ئەوەی لەوە زیاتر ناو ماڵی كوردی لەبەریەك هەڵنەوەشێ و ناچارمان نەكەن بە هەڵوێستی تر.

لە بەشێكی تری كۆبوونەوەكەدا باس لە ئامادەكاریەكان بۆ (28)هەمین ساڵیادی راگەیاندنی یەكگرتوو لە (6/2/2022) كرا و بەرنامەی تایبەت بە یادەكە بڕیاری لەسەردرا.

هەروەها كاروبارەكانی ناوخۆی حیزب تەوەرەیەكی دیكەی كۆبوونەوەكە بوو، كە بەشێوەیەكی ئیجابی هەڵسەنگاندن كرا بۆ سەرجەم چالاكیەكانی ئەنجومەن و دەزگا و مەڵبەند و ئۆرگانەكانی تری حزب.

ئەنجومەنی جێبەجێكردنی یەكگرتووی ئیسلامی كوردستان

ر. ئ.