مەودا میدیا-

وەزارەتی ئەوقاف و کاروباری ئایینی لەبارەی داهاتی وەزارەتەکو و موڵکەکانیەوە روونکردنەوە دەدات و ئاماژە بەوە دەکات ساڵی رابردوو حکومەت دوو ملیار دیناری بۆ نۆژەنکردنەوەی مزگەوت و هاوکاریکردنی مامۆستایانی ئایینی خەرجکردووە.

وەزارەتی ئەوقاف و کاروباری ئایینی هەرێمی کوردستان لە روونکردنەوەیەکدا ئاماژەی بەوەکردووە "دەربارەی داھاتی وەقفی موڵکەکان، داھاتەکەی دەچێتە سندوقێکی تایبەت لە خەزێنەی حکومەت کە پێی دەوترێ سندوقی (الامانات) و پارێزراوە بەپێی (مەرجی واقف) و ھەروەھا پاڵپشت بە یاسایی ژمارە 11ی ساڵی 2007 بڕگەی 4".

لە روونکردنەوەکەدا هاتووە "وەزارەتمان لەماوەی رابردوودا پلانێکی تۆکمەی بە ھەماھەنگی کەسانی شارەزا و لایەنی پەیوەندار بە مەبەستی رێکخستن و وەبەرھێنان لە موڵکە وەقفیەکان دەستپێکردووە، بۆئەوەی لەمەودوا بتوانین باشتر خزمەتی مزگەوت و موڵکە وەقفیەکان و پەرەپێدانیان بکەین"

بەگوێرەی روونکردنەوەکەی وەزارەتی ئەوقاف؛ حکومەتی ھەرێمی کوردستان لە بوودجەی گشتی ساڵانەدا بۆ نۆژەنکردنەوەی مزگەوت وھاوکاری مامۆستایانی بەڕێزی ئایینی لە ساڵی 2021دا بڕی دوو ملیار دیناری خەرجکردووە.

ب.م