مەودا میدیا-

لە سلێمانی هەر خاوەن کار و بازرگانێک لە کاتی تازە کردنەوەی مۆڵەتی تەندروستی، پێویستە پابەندی رێنماییە تەندروستییەکان بێت و کارتی ڤاکسینیان پێ بێت بەپێچەوانەوە مۆڵەتی بۆ تازە ناکرێتەوە.

بەڕێوەبەرایەتیی گشتیی تەندروستیی سلێمانی لە راگەیەنراوێکدا ئاماژەی بەوەکرد "ئاگاداری بازرگانان و خاوەن کارەکان دەکرێتەوە لە بەرواری (10 - 2 - 2022) بەدواوە هەر خاوەن کارو بازرگانێک لە کاتی دەرهێنان و تازە کردنەوەی مۆڵەت و ناسنامەی  تەندروستی، پێویستە پابەندی رێنماییە تەندروستییەکان بێت".

باسی لەوەشکردووە، خاوەنکارەکان دەبێت کارتی ڤاکسینیان پێ بێت بەپێچەوانەوە هەر خاوەن کار و بازرگانێک کارتی ڤاکسینی پێ نەبێت مامەڵەکانی رایی ناکرێت و مۆڵەتی کاری بۆ نوێ ناکرێتەوە.

هاوکات بەڕێوەبەرایەتیی گشتیی تەندروستیی سلێمانی ئەوەشی خستووەتەڕوو، خاوەنکارەکان بۆ وەرگرتنی زانیاری لەبارەی رێنماییەکانی تایبەت بە تازە کردنەوەی مۆڵەت و ناسنامەی  تەندروستی دەتوانن سەردانی ماڵپەڕی تەندروستیی سلێمانی بکەن.

ر. ئ.