مەودا میدیا-

رێبەری رەوتی سەدر پەیامێکی بڵاوکردەوە لەبارەی بەهای دۆلارەوە و رایدەگەیەنێت بەرزکردنەوەی بەهای دۆلار و زیان و قازانجەکانی نابێت ببێتە هۆی بەرزبوونەوەی نرخی شتمەک.

لە جریوەیەکەدا لە تۆڕی کۆمەڵایەتیی تویتەر موقتەدا سەرد، رێبەری رەوتی سەدر نووسیویەتی "نابێت بەرزبوونەوەی بەهای دۆلار ببێتە هۆی بەرزبوونەوەی نرخی شمەک و بە تایبەت ئەو شمەکانەی پێداویستی رۆژانەی خەڵکە".

ئاماژەی بەوەشکردووە "بەرەو مانگی رەمەزان دەڕۆین و دەبێت حکومەت ئاسایشی خۆراک بپارێزێت و سزای هەموو ئەو کەسانە بدات، کە دەیانەوێت نرخەکان بەرزبکەنەوە".

نووسیویشیەتی "دەبێت بازرگانەکانیش دۆخی گەل لەبەرچاوبگرن، نەک تەنیا گیرفانی خۆیانیان بەرچاو بێت، نابێت چاوجنۆکانە مامەڵە بکەن، چونکە بەرانبەر خودا و گەلیش بەرپرسیارن، هەروەها پێویستە حکومەت و لایەنە پەیوەندیدارەکان رێکاری پێویست دژی ئەو کەسانە بگرنەبەر کە نرخەکان بەرزدەکەنەوە".

س،ر