مەودا میدیا-

 سه‌رۆكی پارتی دیموكراتی كوردستان په‌یوه‌ندیه‌كی ته‌له‌فۆنی له‌گه‌ڵ رێبه‌ری ره‌وتی سه‌در ئه‌نجامدا و رێكه‌وتن له‌سه‌ر ئه‌نجامدانی كۆبوونه‌وه‌ی هاوپه‌یمانیی سێقۆڵی نێوانیان له‌چه‌ند رۆژی داهاتوودا.

لە راگەیەندراوێکی بارەگای بارزانیدا هاتووە، ئەمڕۆ پێنجشەممە 17ی شوباتی 2022 مەسعود بارزانی، سەرۆکی پارتی دیموکراتی کوردستان و موقتەدا سەدر، سەرۆكی رەوتی سەدر، لەڕێی تەلەفۆنەوە پڕۆسەی سیاسیی عیراقیان تاوتوێ كرد.

لە راگەیەندراوەکەدا هاتووە، هەر لەو پەیوەندییە تەلەفۆنییەدا باس لە گرتنەبەری هەنگاوی پێویست و هەماهەنگی لە هەڵوێستەكانی هاوپەیمانێتی ستراتیژیی سێقۆڵی لە قۆناغی ئێستادا كرا، ئەویش لەپێناو گەیشتن بە پێكهێنانی حكومەتی زۆرینەی نیشتیمانی.

لە پەیوەندییە تەلەفۆنییەکەدا هەردوولا لەسەر پێویستی كۆبوونەوەی هێزە پێكهێنەرانی هاوپەیمانێتیی سێقۆڵی لە رۆژانی داهاتوو رێككەوتن.

هاوپه‌یمانی سێ قۆڵی (سه‌در و پارتی دیموكراتی كوردستان و سیاده‌) خاوه‌نی 171 په‌رله‌مانتارن، به‌جۆرێك كوتله‌ی سه‌در خاوه‌نی 73 كورسی و پارتی خاوه‌نی 31 كورسی و هاوپه‌یمانی سیاده‌ خاوه‌نی 67 كورسی په‌رله‌مانین.

ر. ئ.