مەودا میدیا-

دوای پێشنیازەکانی موقتەدا سەدر دەستەی سەرۆکایەتیی پەرلەمانی عیراق بڕیاریدا بانگهێشتی وەزیری دارایی و پارێزگاری بانکی ناوەندیی عیراق بکات.

ئەمڕۆ پێنجشەممە نووسینگەی حاکم زاملی، جێگری سەرۆکی پەرلەمانی عیراق رایگەیاند، دەستەی سەرۆکایەتیی پەرلەمان بڕیاریداوە عەلی عەلاوی، وەزیری دارایی و مستەفا غالب، پارێزگاری بانکی ناوەندیی بانگبکات بۆ دانیشتنی پەرلەمانی عیراق.

ئەوەشی خستووەتەڕوو، لەسەر رێنمایی موقتەدا سەدر، رێبەری رەوتی سەدر ئەم بڕیارەیانداوە.

ئەمەش دوای ئەوەدێت، موقتەدا سەدر سەرۆکی رەوتی سەدر لەبارەی بەرزبوونەوەی نرخی دۆلار بەرانبەر بە دینار تویتێکی بڵاوکردەوە تێیدا شەش پێشنیازەی بۆ دابەزاندنی بەهای دۆلار خستەڕوو:

یه‌كه‌م: راگرتنی به‌هه‌ده‌ردانی دراوه‌كان و به‌تووندی رێگری بكرێت له‌ دراوی ساخته‌.

دوه‌م: ره‌چاوی هه‌ندێك بانكی وه‌ك بانكی رۆژهه‌ڵاتی ناوه‌ڕاست و قابز و ئه‌نساری سه‌ر به‌ چه‌ند كه‌سێك بكرێت كه‌ كۆنتڕۆڵی به‌های دراوه‌كان ده‌كه‌ن له‌گه‌ڵ هه‌ندێك بانكی دیكه‌ی ناحكومی.

سێیه‌م: ده‌ستبه‌جێ پارێزگاری بانكی ناوه‌ندی بۆ په‌رله‌مان بانگهێشت بكرێت.

چواره‌م: ده‌ستبه‌جێ وه‌زیری دارایی بانگهێشتی به‌رده‌م په‌رله‌مان بكرێت.

پێنجه‌م: رێكخستنی بازاڕی دراوی عیراقی به‌ شێوه‌یه‌كی ناوه‌ندی و رێكوپێك و به‌پێی یاساگه‌لێك كه‌ به‌های دیناری عیراقی زیاد بكات.

شه‌شه‌م: مامه‌ڵه‌كردنی پته‌و له‌گه‌ڵ چه‌ند بانكێكی سه‌ر به‌ هه‌ندێك له‌و حزبانه‌ی كه‌ كۆنتڕۆڵی وڵات و خه‌ڵكیان كردووه‌.

ر. ئ.