مەودا میدیا-

‎دوانیوەڕۆی ئەمڕۆ پێنجشەممە لە شاری سلێمانی، كۆسرەت ڕەسول عەلی، سەرۆكی ئەنجومەنی باڵای سیاسی و بەرژەوەندی یەكێتیی نیشتمانیی كوردستان پێشوازیكرد لە عوسمان بایدەمیر سیاسەتمەداری كورد.

‎لە دیدارەكەدا كە هەریەك لە سەعدی ئەحمەد پیرە، دارا ڕەشید ئەندامانی ئەنجومەنی سەركردایەتی ئامادەی بوون گفتوگۆكرا لەبارەی دۆخی كورد لە ناوچەكە و هەردوولا هاوڕابوون پێویستە كێشەی كورد بە ئاشتی و دیالۆگ چارەسەر بكرێ و مافە دەستووری و نەتەوەییەكانی كورد زامن بكرێ.

‎بەشێكی تری دیدارەكە باسكردن بوو لە پەیوەندییەكانی نێوان یەكێتیی نیشتمانیی كوردستان و هێزە سیاسییە كوردییەكان، سەرۆكی ئەنجومەنی باڵای سیاسی و بەرژەوەندی یەكێتیی نیشتمانیی كوردستان وتی " یەكێتی هەمیشە پەیوەندییەكی پتەوی لەگەڵ سەرجەم هێزو لایەنە سیاسییە كوردستانییەكان هەبووەو بەردەوام دەبێ لەسەر پەرەپێدانی زیاتری ئەم پەیوەندییانە". 
‎
ئاماژەی بەوەشكرد "گۆڕانكارییەكانی ناوچەكە ئەوەمان لێدەخوازێ كورد یەكدەنگ و یەكهەڵوێست بێ و بۆ ئەگەرو پێشهاتەكان خۆی ئامادە بكات".

‎لای خۆیەوە عوسمان بایدەمیر باسی لە ڕۆڵی یەكێتی نیشتمانی كوردستان كردو دووپاتی كردەوە كە یەكێتی هێزێكی گەورەو كاریگەری گۆڕەپانی سیاسییە لەعێراق و ناوچەكەو پێویستە ڕۆڵی زیاتری هەبێ لە ڕووداوەكاندا.
‎هەروەك تیشكی خستە سەر هەڵوێستی كۆسرەت ڕەسول و ڕۆڵی لە خەباتی ڕزگاریخوازی كوردستان بەرزنرخاندو وەك سەركردەیەكی گەورە وەسفی كرد.