مەودا میدیا-

وەزارەتی کشتوکاڵ و سەرچاوەکانی ئاو لە حکومەتی هەرێمی کوردستان ژورێکی تایبەتیان پێکهێنا لە بەڕێوەبەرایەتی گشتی سامانی ئاژەڵ و ڤێتێرنەری بۆ رووبەڕووبوونەوەی کۆرۆنا.

بێگەرد تاڵەبانی وەزیری کشتوکاڵ و سەرچاوەکانی ئاو رایگەیاند "بەپشت بەستن بە زانیاریەکانی رێکخراوی تەندروستی جیهانی بڕیاری قەدەغەکردنی زیندەوەری ئاوی و باڵندەو ئاژەڵی جوانی لەو وڵاتانەی ڤایرۆسەکەی تێدا بڵاوبووەتەوە قەدەغە کرا لەوانە وڵاتی ئێران".

 ئاماژەی بەوەشکرد "هەڵمەتی رشاندنی هۆڵەکانی ئاژەڵ و ئەو شوێنانەی  ئاژەڵ و باڵندەی تیایدا دەفرۆشێت، ئاگادار کردنەوەی نۆرینگە و شوێنەکانی کەرتی تایبەت کە مامەڵە بە باڵندەو ئاژەڵی جوانی دەکەن بە رشاندنی شوێنەکانیان".

هەروەها "پێکهێنانی لیژنەیەکی هاوبەش لەنێوان بەڕێوەبەرایەتی ڤێتێرنەری پارێزگاکان، یەکە ئیداریەکان و فەرمانگاکانی تەندروستی، ژینگەو لایەنە پەیوەندارەکان تایبەت بەم ڤایرۆسە".

بێگەرد تاڵەبانی ئەوەشی خستوەتەڕوو "رۆژانە بەدواداچوونی ورد بکرێت بۆ زانینی بڵاوبونەوەی ڤایرۆسەکە لە وڵاتان بۆ گرتنەبەری رێکاری قەدەغەکردنی هاوردەی  ئاژەڵ و باڵندە".