مەودا میدیا- سازگار ئەحمەد

بەیانی ئەمڕۆ لە لە گوندی ئیسڵاح سەربە ناحیەی جەلەولا بۆمبێکی چێندراو تەقییەوە و بەهۆیەوە دووبرا برینداربوون.

عەمید کەمال مەحمود، فەرماندەی لیوای 5ی هێزەکانی پێشمەرگە لە ناحیەی کوڵەجۆ بە مەودا میدیای راگەیاند "بەیانی ئەمڕۆ کاتژمێر 8:45 خولەک لە گوندی ئیسڵاح نزیک چەمی سیروان بۆمبێکی چێندراو تەقیوەتەوە و بەهۆیەوە دووبرا برینداربوون".

ئاماژەی بەوەشکرد "ئەو دووبرایە ناویان (غەسان و مونزیر راشد)ن برینی یەکێکیان سەختە و ئەوی دیکەیان تەندروستی باشە".

ناوبراو ئەوەشی خستەڕوو "کە چەند ساڵێک پێش ئێستا باوکی ئەو دوو کوڕە لەلایەن چەکدارانی داعشەوە کوژراوە، هەروەها بۆمبەكەش لە نزیک باخەکەی ئەوان دانراوە".