مەودا میدیا-

وه‌زیری ئه‌وقاف و كاروباری ئایینی حكومه‌تی هه‌رێم رایدەگەیەنێت "هه‌ر رێكخراوێك به‌بێ ره‌زامه‌ندی چالاكی ئایینی و كردنه‌وه‌ی خولی جۆراوجۆر بۆ له‌به‌ركردنی قورئانی پیرۆز ئه‌نجامبدات، رووبه‌ڕووی دادگەی ده‌كه‌ینه‌وه‌".

به‌گوێره‌ی نووسراوێكی وه‌زاره‌تی ئه‌وقاف و كاروباری ئایینی كه‌ واژۆی پشتیوان سادق، وه‌زیری ئه‌وقاف و كاروباری ئایینی له‌سه‌ره‌ و ئاراسته‌ی وه‌زاره‌تی ناوخۆ كراوه‌ تێیدا هاتووە "به‌مه‌به‌ستی كۆنتڕۆڵكردن و ئاگاداربوون له‌ كاری ئه‌و رێكخراوانه‌ی هه‌ڵده‌ستن به‌ئه‌نجامدانی چالاكی له‌و بواره‌ جۆراو جۆره‌كانی ئایینی وه‌ك به‌خشین به‌ناوی ئایینی و كردنه‌وه‌ی خولی جۆراوجۆر بۆ فێربوون و له‌به‌ركردنی قورئانی پیرۆز له‌ باره‌گاكانیان یان ئه‌و شوێنانه‌ی كه‌ له‌لایه‌ن خۆیانه‌وه‌ دیاریده‌كرێن، داواكارین به‌ئاگاداركردنه‌وه‌یان كه‌ هه‌ر چالاكییه‌كی له‌و جۆره‌ پێویسته‌ ره‌زامه‌ندی ئێمه‌ی له‌سه‌ربێت".

باسی لەوەشکردووە "ئه‌گه‌ر ره‌زامه‌ندی ئێمه‌ له‌سه‌ر ئه‌و چالاكیانه‌ نه‌بێت، رێكاری یاسایی پێویست ده‌گرینه‌به‌ر و رووبه‌ڕووی دادگەیان ده‌كه‌ینه‌وه‌، بۆئه‌و مه‌به‌سته‌ش كاری پێویست ئه‌نجامبده‌ن".

نووسراوه‌كه‌ی وه‌زیری پشتیوان سادق وه‌زیری ئه‌وقاف و كاروباری ئایینی ناڕه‌زایه‌تی به‌شێك له‌ هاوڵاتییان و رێكخراوه‌كانی لێكه‌وته‌وه‌ و به‌ به‌رته‌سككردنه‌وه‌ی كار و چالاكی رێكخراوه‌ ئایینییه‌كان وه‌سفیان كردووه‌.

ر. ئ