مەودا میدیا-

پاش ئەوەی بۆ ماوەی چەند رۆژی لەسەریەك بەهاكەی دابەزینی بەخۆوە دەبینی، ئەمڕۆ نرخی نەوت لە بازاڕەكانی جیهاندا بەرزبووەوە و شارەزایان دەڵێن "هۆكار زیادبوونی خواستە لەسەر بەرهەمەكە".

ئەمڕۆ پێنجشەممە 11ی ئایاری 2023، نرخی نەوتی برێنت لە بازاڕەكانی جیهاندا 61 سەنت بەرزبوونەوەی تۆماركرد و یەك بەرمیل نەوتی برێنت بە 77.04 دۆلار مامەڵەی پێوەكرا، نرخی نەوتی رۆژئاوای تەكساسی ئەمەریكی هاوشێوە برێنت بەرزبووەتەوە.

بەپێی ئاژانسە ئابوورییەكانی جیهان، یەك بەرمیل نەوتی خاوی تەكساسی ئەمریكیی ئەمڕۆ پێنجشەممە بە 73.14 دۆلار مامەڵەی پێوەكراوە و بەهاكەی بەراورد بە چەند رۆژی رابردوو 58 سەنت بەرزبووەتەوە.

بەرزبوونەوەی بەهای نەوت لە بازاڕەكانی جیهان پەیوەستە بە بەرزبوونەوەی خواستی ویلایەتە یەكگرتووەكانی ئەمەریكا لەسەر ئەو بەرهەمە، كە ئەو وڵاتە گەورەترین وڵاتی بەكاربەری نەوتە لە جیهاندا.

هاوكات جەنگی نێوان رووسیا و ئۆكرانیا یەكێكە لە فاكتەرە سەرەكییەكانی ناجێگیریی  نرخی نەوت و گۆڕانكاریی لە وەبەرهێنانی بەرهەمەكە لە جیهاندا.

ژ.ع