مەودا میدیا-

وەزارەتی ناوخۆی عیراق بڕیاریداوە بەدواداچوون بۆ پێشانگاکانی ئۆتۆمبێل بکات تاوەکو لەکاتی مامەڵەی کڕین و فرۆشتنی ئۆتۆمبێل بە دۆلار مامەڵە نەکەن.

جەمالەدین عەبدولڕەزاق، بەڕێوەبەری نەهێشتنی تاوان لە وەزارەتی ناوخۆی عیراق رایگەیاند "خاوەن پێشانگاکانی ئۆتۆمبێل و بازاڕەناوخۆییەکان بەدواداچونیان بۆ دەکرێت و لەژێر ڕێنمایی وەزیری ناوخۆ بڕیاردراوە کە ئەوان مامەڵەی کڕین و فرۆشتنی ئۆتۆمبێل بە دۆلار نەکەن".

ئاماژەی بەوەشکرد "پێویستە مامەڵەی ئۆتۆمبێل بە دیناری عیراقی بکرێت بە تایبەت لە پارێزگای سەڵاحەدین، هەروەها مەفرەزەکانمان بەدواداچوون بۆ ئەم بابەتە دەکەن و بەڵێننامەیان لە بازرگانەکان و خاوەن پێشانگاکان کردوە کڕین و فرۆشتن بە دینار بکەن بۆ ئەوەی بەهای دینار بەرزبێتەوە".

س.ر