مەودا میدیا-

راوێژكاریی سندوقی نەتەوە یەكگرتووەكان لە عیراق رایدەگەیەنێت، لەئێستادا وڵاتەكە كێشەی "تەقینەوەی دانیشتوان"ی نییە و رێژەی گەشەی دانیشتوان لە دابەزیندایە.

مەهدی عەلاق، راوێژكاری نەتەوە یەكگرتووەكان بۆ كاروباری دانیشتووان لە عیراق ئەمڕۆ دووشەممە 26ی حوزەیرانی 2023 رایگەیاند "ئێستا لە عیراق تەقینەوەی دانیشتووان بوونی نییە" و جەختیكردەوە پێویستە بابەتییانە رووبەڕووی ئەو دیاردەیە ببنەوە.

ئاماژەی بەوەشكرد، بۆ یەكەمینجار تێكڕای گەشەی دانیشتووان لە عیراق دابەزیوە و بۆ نزیكەی لەسەدا 2.5، لەكاتێكدا پێنج ساڵ لەمەوبەر ئەو رێژەیە 3% بوو.

ئەو بەرپرسە لە نەتەوە یەكگرتووەكان وتیشی، رێژەی منداڵبوون لەناو ژنانی عیراق لە حەفتاكانی سەدەی رابردوودا بەرزووەوە بەشێوەیەك تێكڕا حەوت منداڵیان دەبوو، بەڵام ئێستا ئەو رێژەیە گەیشتووەتە 4.3 منداڵ.

ژ.ع