مەودا میدیا-

نووسینگەی سەرۆك وەزیرانی ئیسرائیل رایگەیاند، ژنە توێژەرێكی وڵاتەكەی كە چەند مانگێكە ونبووە، دەركەوتووە لەلایەن گرووپێكی چەكدار لە عیراق رفێندراوە.

ئەمڕۆ چوارشەممە 5ی تەمموزی 2023 نووسینگەی بنیامین نەتانیاهو، سەرۆك وەزیرانی ئیسرائیل رایگەیاند "چەند مانگێك لەمەوبەر ئێلیزابێس تسۆركۆڤ، ژنە توێژەری ئیسرائیل لە عیراق دیارنەماوە و ونبووە".

ئاماژەی بەوەشكردووە، زانیویانە ئێلیزابێس لەژیاندایە و لەلایەن كەتیبەكانی حزبوڵا دەستبەسەرە و لە عیراق دەستبەسەریانكردووە.

بەپێی ناوەرۆكی راگەیەندراوەكە، ئێلیزابێس كە لە زانكۆی پرینستن-ی ئەمەریكی توێژەرە، پێشتر بە پاسپۆرتە رووسییەكەی سەردانی عیراقی كردووە بەمەبەستی توێژینەوە لە تێزی دكتۆراكەی.

هاوكات لەو راگەیەندراوەدا سەرۆك وەزیرانی ئیسرائیل عیراق بەرپرسیاردەكات لە چارەنووسی ئەو ژنە توێژەرە و سەلامەتیی گیانی، چونكە نیگەرانن لەو بارەیەوە.

لەلایەكی دیكەوە كەتیبەكانی نزیك لە حزبوڵا و چەكدارانی هەماهەنگ لەگەڵیان رایانگەیاندووە، ئێلیزابێس لە هەژماری تویتەری خۆی جەختی لەوە كردووەتەوە ساڵی 2016 لە جەنگی دژ بە چەكدارانیان بەشداربووە.

هاوكات باڵیۆزخانەی رووسیا لە بەغدا دەڵێت، هیچ زانیارییەك لەبارەی ئەو خانمەتوێژەرە و پاسپۆرتەكەی نازانن و هیچ زانیارییەكیان لەوبارەیەو بەردەست نییە.

ژ.ع