مەودا میدیا - 

 

کەمێک لەمەوبەر هێزێکی سوپای عیراق بە چەک و کەرەستەی سەربازییەوە هەڵیانکوتاوەتە سەر گوندی تۆپزاوە و بەبێ هیچ ئاگادارکردنەوەیەک لەپێشوەختدا لەناو گوندەکەدا بڵاوەیانکردووە و دانیشتووانی گوندەکەیان ترساندووە.

 

ئێوارەی ئەمڕۆ دووشەممە 28ی ئابی 2023 هێزێکی سەربازیی فیرقەی 11ی سوپای عیراق بە چەک و کەرستە سەربازییەکانیانەوە هەڵیانکوتاوەتە سەر گوندی تۆپزاوە و بەپێی زانیارییەکانی مەودا میدیا چوونەتە نێو هۆڵی ئەنفالی گوندەکەوە و دەیانەوێت داگیریبکەن.

 

هەر بەپێی زانیارییەکان، هێزەکە هەمەری سەربازیی و چەکی تەواویان پێیە و بەناو هەموو گوندەکەدا بڵاوەیانکردووە و مەبەستیان داگیرکردنی زەویی گوندەکەیە، پێشتریش وەزارەتی بەرگریی عیراق ویستی ئەم کارەبکات.

 

مەودا میدیا ئەوەشی زانیوە کە لەماوەکانی رابردوودا هەریەک لە وەزارەتی شارەوانیی و بەرگریی عیراق هەوڵیاندا سەربازگەی کۆنی سەبازیی لە ناوچەکە دووبارە دروستبکەنەوە لەسەر رووبەری 4500 دۆنم زەوی.

ر.ع