مەودا میدیا-

بەڕێوەبەرایەتیی ئاسایشی هەولێر دەستگیركردنی تۆمەتبارێكی راگەیاند كە بە چەقۆ هاوڵاتییەكی بەساڵاچووی برینداركردبوو لەپێناو بردنی بڕەپاریەك.

رێکەوتی  23ی ئابی 2023 رووداوەكە لە لەشاری هەولێر روویداوە و بەپێی زانیارییە راگەیەندراوەكان، کەسێکی نەناسراو  بە فێڵی پارەگۆڕینەوە هەستاوە بە فریودانی هاوڵاتییەکی بەساڵاچوو بەناوی (کاکل لەتیف) و بردوویەتیە ناو باڵەخانەی  بازاڕی نیشتمان.

ئەو تۆمەتبارە دواتر بەمەبەستی بردنی ئەو بڕەپارەیەی كە هاوڵاتییە بەساڵاچووەكە پێیبووە، بە چەقۆ هێرشیکردووەتەسەری و چەند چەقۆیەکی لێداوە، پاشان بۆ شوێنێکی نادیار هەڵهاتووە.

لە راگەیەندراوەكەدا ئاماژە بەوەكراوە، دوای ئەنجامدانی بەدواداچوون لەلایەن هێزەکانی بەڕێوەبەرایەتیی ئاسایشی هەولێر، توانیویانە ناسنامەی تۆمەتبارەکە ئاشکرابکەن بەناوی (ص، ج ، أ) و بە فەرمانی دادوەری لێکۆڵینەوەی ئاسایشی هەولێر دەستگیرکراوە.

ژ.ع