مەودا میدیا-

ئەمڕۆ لەسەر رێگەی كۆیە - دوكان ئۆتۆمبێلێكی وەزارەتی دارایی هەرێم لە رووداوێكی هاتوچۆدا وەرگەڕا و مەودا میدیاش زانیاریی زیاتر لەبارەیەوە بڵاودەكاتەوە.

بەپێی زانیارییەكانی دەست مەودا میدیا كەوتووە، ئۆتۆمبێلی ئەمین سندوقی بانكی ناوەندیی هەرێم لەگەڵ بارهەڵگرێك كە مووچەی لیوا هاوبەشەكانی پێمەرگەی پێبووە و دوو ئۆتۆمبێلی هێزە ئەمنییەكان پێكەوە لە هەولێرەوە بەرەو سلێمانی بەڕێكەوتوون و لە رێگە ئۆتۆمبێلی ئەمین سندوقی بانكی ناوەندیی هەرێم وەرگەڕاوە.

سەرەتا سەرچاوەكانی هەواڵ بڵاویانكردەوە، ئەو ئۆتۆمبێلەی وەرگەڕاوە، تایبەت بووە بە گواستنەوەی مووچەی فەرمانبەرانی هەرێم و مووچەكەی تێدابووە، بەڵام دواتر ئاشكرابوو، ئۆتۆمبێلی ئەمین سندوقی بانكی ناوەندیی هەرێم بووە كە وەرگەڕاوە.

وەك لە وێنە و ڤیدیۆی رووداوەكەدا دەركەوتووە، ئۆتۆمبێلەكەی لەسەر رێگەی كۆیە - دوكان تووشی رووداوی هاتوچۆ بووە لە جۆری پرادۆیە و دەستبەجێ لایەنی پەیوەندیدار چووەتە شوێنی رووداوەكە.

هاوكات پارەی لیوا هاوبەشەكانی پێشمەرگە بێ هیچ كێشەیەك گەیشتووەتە سلێمانی، ئەوەش بەپێی وتەی سەرچاوەكانی هەواڵ لە وەزارەتی دارایی هەرێم.

ژ.ع