مەودا میدیا-

دوو بانكی عیراقی سەردانی بانكی ناوەندی عیراق لە هەرێمی كوردستانیان كردووە بەمەبەستی كردنەوەی لقیان لە هەرێمی كوردستان و بەڕێوەبەری بانكی ناوەندی هەرێمیش زانیاری دەخاتەڕوو.

حاجی عابید مزوری، بەڕێوەبەری بانكی ناوەندی عیراق لە هەرێمی كوردستان بە مەودا میدیای راگەیاند "لە ماوەی رابردوو نوێنەری بانكی رەشید و بانكی رافیدەینی عیراق سەردانی ئێمەیان كردووە بەمەبەستی وەرگرتنی زانیاری بۆ ئەوەی لقیان لە هەرێمی كوردستان بكەنەوە".

ئەوەشی خستەڕوو "ئێمە رێنمونیمان كردون و زانیاریمان پێداون و رەوانەی لای وەزیری دارایی حكومەتی هەرێمی كوردستانمان كردون بۆ ئەوەی ئەوانیش شێوازی كردنەوە و مەرج و رێنمایەكانیان پێبدەن".

بەڕێوەبەری بانكی ناوەندی لقی هەرێمی كوردستان هەروەها وتی "ئەو دوو بانكە پێویستە رەزامەندی لە ئەنجومەنی وەزیرانی هەرێمی كوردستان وەربگرن و لە حاڵەتی كردنەوەی لقیان پێویستە وەك هەر هاوڵاتیەكی تری عیراق هاوڵاتیانی هەرێمی كوردستان سودمەندبن لە وەرگرتنی قەرز كە ئەو بانكانە دەیدەن بە هاوڵاتیانی عیراقی".