مەودا میدیا-

بەڕێوبەرایەتی پۆلیسی قەزای قەرەداغ دەستگیرکردنی سێ تۆمەتباری راگەیاند بەتۆمەتی فرۆشتنی منداڵێکی ساوا کە تەمەنی تەنها چوار رۆژە.

بەڕێوبەرایەتی پۆلیسی قەزای قەرەداغ  رایگەیاند "ئەمڕۆ بە سەرپەرشتی بەڕێزان  مقدم سیامند ، بەڕێوبەری  بەشی پۆلیسی قەزای قەرەداغ و هاوکار جەبار ، لێپرسراوی ئاسایشی قەزای قەرەداغ 3 تۆمەتبار دەستگیرکران لە گوندەکانی کانی هەنار  و  دەلوجە  کە  دوو پیا و ئافرەتێک بوون هەستاون بەفرۆشتنی منداڵێکی ساوای چوار رۆژە بە بڕی 11  وەرەقە بەکەسێکی دیکە".

ئاماژە بەوەشکراوە "لەماوەی کاتژمێرێک لە کڕین و فرۆشتنە کە توانرا لە لایەن هێزەکانی بەشی پۆلیسی قەزای قەرەداغ و ئاسایشی قەزای قەرەداغ ناوبراوان دەستگیر بکرێن و دەست بەسەرپارەکەدا بگیرێت و منداڵەکەش رەوانەی نەخۆشخانەی شار بکرێت بەمەبەستی چاودێریکردن".