مەودا میدیا- سازگار ئەحمەد

هەرچەندە ماوەی چەند رۆژێکە بڕیاری کردنەوەی بازاڕی دۆلارەکەی سلێمانی دراوە، بەڵام وەک خاوەنی نوسینگەیەکی دراو دەڵیت "بازاڕ وەک و جاران نییە و رۆژانە کار کردن کەمە".

سامان عادل، خاوەنی نوسینگەی ئاڵوگۆڕی دراو لە بازاڕی دۆلارەکەی شاری سلێمانی بە مەودا میدیای راگەیاند "رۆژانە ئێمە لە کاتژمێر 11:00ی پێشنیوەڕۆ تاوەکو کاتژمێر 2:00 بۆ 3:00ی پاشنیوەڕۆ دوکانەکانمان دەکەینەوە".

ئاماژەی بەوەشکرد "بازاڕ وەک و جاران نییە و رۆژانە هاوڵاتییانی کەم دێن بۆ ئاڵوگۆڕکردنی دراو ئەمەش وایکردووە کاریگەری لەسەر کارەکانمان دروستکردووە".

سامان عادل ئاماژەی بەوەشکرد "ماوەی چەند رۆژێکە نرخی دۆلار بەرامبەر دیناری عیراقی جێگیرە و تەنها دراوی سووری و تمەن نرخیان زۆر نزمە".

جێگای ئاماژەیە، بەهۆی رێگریکردن لە بڵاوبوونەوەی ڤایرۆسی کۆرۆنا لەلایەن وەزارەتی ناوخۆوە قەدەغەی هاتووچۆ راگەیاندرا لە بەشێکی زۆر لە شاروشارۆچکەکانی هەرێمی کوردستان، هەروەها دوکان و بازاڕەکان داخران ئەمەش کاریگەری لەسەر باری ئابووری هاوڵاتییان دروستکردووە.