مه‌ودا میدیا-

وەزارەتی دارایی عیراق، بڕیاریداوه‌ سبه‌ینێ رۆژی چوارشەممە ده‌ستبكرێت به‌ ئه‌نجامدانى رێککارەکانی ناردنی پارە بۆ هه‌رێمى كوردستان، بۆ دابه‌شكردنى مووچەی مانگی چوارى فه‌رمانبه‌رانى هه‌رێم.

سەرچاوەیەک لە وەزارەتی دارایی عیراق ئاشكرایكرد "ئەمڕۆ سێشەممە، تەیف سامی، وەزیری دارایی عیراق، داوای لە فەرمانگەی ژمێرکاریی کردووە، پارە بۆ وەزارەتی دارایی و ئابووریی حکومەتی هەرێمی کوردستان بنێرێت، بەمەبەستی دابەشکردنی مووچەی مانگی نیسانی مووچەخۆرانی هەرێمی کوردستان".

راشیگه‌یاند "دوای وردبینیکردنی لیستی مووچەی مووچەخۆرانی هەرێمی کوردستان، دەرکەوتووە ئەو بڕە پارەیەی بۆ مووچەی مانگی نیسان پێویستە، زیاترە لەو بڕەی بۆ مووچەی مانگی ئازار نێردراوە".

سه‌باره‌ت بەوەی تاوەکو چەند پرسی بە بانکیکردنی مووچە رێگرە لە ناردنی مووچەی فەرمانبەران، سەرچاوەکەی بۆ کەناڵ8 ئه‌وه‌ى خستووه‌ته‌ڕوو "بڕیاربوو مووچەی مانگی نیسان نەنێردرێت، تاوەکو بەبانکیکردنی مووچەی مووچەخۆران دەستپێدەکات، دواتر بڕیاردراوە بۆ مانگی نیسانیش مووچە بنێردرێت، بەڵام بۆ مانگی داهاتوو ئەوە کراوەتە مەرج کە پرۆسەی بەبانکیکردنی مووچە دەبێت دەستیپێکردبێت، پاشان پارە بۆ هەرێمی کوردستان دەنێردرێت".

پ ح ع