مه‌ودا میدیا-

ئاژانسێكى جیهانى، له‌ باره‌ى سه‌ردانه‌كه‌ى هه‌فته‌ى رابردوو مه‌سعود بارزانى، سه‌رۆكى پارتى دیموكراتى كوردستان باس له‌وه‌ ده‌كات هه‌رێم بێ هیوا بووه‌ و ده‌یه‌وێت زمانى نه‌رم به‌رانبه‌ر به‌غدا به‌كاربهێنێت.

ئاژانسى ئەمواج میدیا له‌ راپۆرتێكدا ئه‌وه‌ى بڵاوكرده‌وه‌ "ئەو هەوڵەی بارزانى نیشانەی بێ هیوایی لە پاڵپشتی نێودەوڵەتی و گۆڕینی روانگەى له‌ به‌رانبه‌ر حکومەتی عیراقه‌".

ئه‌وه‌ش باسكراوه‌ "ئەو سه‌ردانه‌ جیاواز لە سه‌ردانه‌كانى پێشوو بووه‌، نیشانەی گۆڕێنی روانگەی هەولێره‌ له‌به‌رانبه‌ر حکومەتی عیراق".

ئاژانسه‌كه‌ باسى له‌وه‌شكردووه‌ "بەرپرسانی کوردی عیراق پێشتر بە هیوای ئەوەی کە کۆمەڵگای نێودەوڵەتی لە بەرانبەر حکومەتی ناوەندی پاڵپشتیان دەکەن، بە زمانی توند لەگەڵ بەغدا قسەیان دەکرد و بەردەوام رەخنەیان لە بەغدا دەگرت، بەڵام ئێستا وادیارە ئەو هیوایە بێ ئەنجام بووە و ئێستا رێبەرانی کورد رێکاری گۆڕینی روانگە و زمانی نەرمتر له‌به‌رانبه‌ر بەغدایان گرتووەتە پێش".