مەودا میدیا-
ئەم هەفتەیە وادەی لێخۆشبوونی قەرزی كارەبای هاوڵاتییان كۆتاییدێت و تا ئێستاش هیچ بڕیارێك بە رەسمی نەدراوە بۆ درێژكردنەوەی ئەو وادیە.

ئالان ئەركان، وتەبێژی بەڕێوەبەرایەتی گشتیی كارەبای گەرمیان بە مەودا میدیای راگەیاند "بە گوێرەی ئەو فەرمانەی كە پێشتر وەزارەتی كارەبا دەریكردووە، رۆژی چوار شەممەی ئەم هەفتەیە 31/7/2024 وادەی لێخۆشبوونی قەرزی كارەبا كۆتاییدێت".

وتیشی "تا ئێستا لەلایەن وەزارەتی كارەباوە هیچ بڕیارێك نەدراوە بۆ  درێژكردنەوەی وادەی ئەو لێخۆشبوونە و ئەو بڕیارەش تەنها لە دەسەڵاتی ئەواندایە، هەركاتێكیش بڕیارێكی لەو شێوەیە بدرێت ئەوا سەرجەم هاوڵاتییانی لێ ئاگادار دەكرێتەوە". 

 بەپێی زانیارییەكانی مەودا، بەشێكی زۆری هاوڵاتییان پارەی كارەبا قەرزارن و لەسەریان كەڵەكە بووە، سەرەڕای ئەو داشكاندنانەش كە تا ئێستاش وەزارەتی كارەبا كردوونی، بەڵام بەشێكی هاوڵاتییان قەرزەكانیان نادەنەوە، كە ئەوەش بۆ ناجێگیری كاتی هاتتنی مووچەی فەرمانبەران دەگەڕێتەوە. 
ئ.پ