مه‌ودا میدیا- 

به‌ وته‌ى بەڕێوەبەرى دارستان و پاوانى سلێمانى، ئاگرەکەی دوێنێ له‌ شاخى گۆیژە و ئەزمەڕ، چه‌ندین دۆنم زه‌وی سووتاندووه‌ و زیانێكى زۆرى به‌ دره‌خته‌كان گه‌یاندووه‌، ده‌شڵێت "ملیاران دینار زه‌ره‌رى دارایی هه‌بووه‌".
 
عەقید تارق حەمەغەریب، بەرێوەبەرى دارستان و پاوانى سلێمانى ئاشكرایكردووه‌ "بەهۆى ئاگرەکەی دوێنێ لەشاخی گۆیژە، 200 دۆنم زەوی سووتاوه‌ و لە ئەزمەڕیش  300 دۆنم زه‌وى سووتاوە".

وتیشى "ئاگره‌كه‌ زیانێکى زۆرى به‌ دره‌خته‌كان گه‌یاندووه‌ و هەندێک لەدارەکان بەتەواوى سوتاون". 

روونیشیكرده‌وه‌ "زیانە داراییەکانیش بە ملیاران دینار دەخەمڵێندرێن، چونكه‌ بە تێکڕا لە هەر دۆنمێک لە شاخى ئەزمەر 120 نەمام چێندراون، نەمامه‌كان بۆ ماوەى سێ ساڵه‌ خزمەت دەکرێن و هەر نەمامێک خەرجییەکەى نزیکەى 100 هەزار دینارە".

ئه‌مه‌ له‌ كاتێكدایه‌، بەرەبەیانی رۆژی دوێنێ دووشه‌ممه‌، ئاگر لە شاخى گۆیژە و ئەزمەڕ کەوتەوە.

پ ح ع