مەودا میدیا-
هەرچەندە حكومەتی هەرێمی كوردستان بڕیاریدا بە كەمكردنەوەی چەند جۆرێك لە باجی سەر پیشە جیاوازەكانی لە هەرێمی كوردستان، بەڵام ئەوە نابێتە هۆكاری هەرزارنبوونی نان لە نانەواخانەكاندا. 

هاوبەش كەریم، نوێنەری نانەواخانەكانی سلێمانی بە مەودا میدیای راگەیاند "نانەوا خانەكان دوو مۆڵەتیان هەیە كە ساڵانە دەبێت تازەی بكەنەوە كە بەهەردوو مۆڵەتەكەوە نزیكەی 800 بۆ 850 هەزار دینارە، واتا لە ساڵێكدا تەنها ئەو بڕە پارەیان بۆ دەگەڕێتەوە كە بەرامبەر نییە بە نرخی تەنها نانێكیش لە ساڵەدا، بۆیە ناتوانن نرخی نان كەم بكەنەوە". 

وتیشی "ئەگەر حكومەت هاوكارییان بكات بە پێدانی غاز بێبەرامبەر یان لە دابینكردنی ئارد و غاز بە نرخی پاڵپشتیكراو ئەوكات ئەوانیش دەتوانن نرخی نان كەم بكەنەوە و لە جێی ئەوەی شەش نان بدەن بە هەزار دینار، هەشت یان 10 نان بدەن بە هەزار دینار". 

ئاماژەی بۆ ئەوەشكرد "ئێستا بە دوو جۆری جیاواز لە نانەواخانەكاندا نان دەفرۆشرێت، كە لە هەندێك نانەواخانەدا شەش نان بە هەزار دینارە بە كێشی 135بۆ140 غرام بۆ هەر گونكێك و لە هەندێك نانەواخانەی تریش هەشت نان بە هەزار دینارە بە كێشی 95بۆ100 غرام بۆ هەر گونكێك". 
ئ.پ